Exo 7 | BJR | STEP | Yáaweefa Mooseena qímaminoo qinau. Qinée aní aiqáanana anée Fáraoona áfusaa Ánutufara foorá márinnaranoo Áaroonafa aní áfasaafa aní tamummáqara fásiqara foorá máriannoo.

Exodus 7

1 Yáaweefa Mooseena qímaminoo qinau. Qinée aní aiqáanana anée Fáraoona áfusaa Ánutufara foorá márinnaranoo Áaroonafa aní áfasaafa aní tamummáqara fásiqara foorá máriannoo. 2 Qinée aiqáma ufa qímamunnana anée Áaroona qímaminanoo mifá Faraoona qímaminanoo Isaraee máqannaasa Isipa máqa máaqaki rumbáqa máriana idukúsainaqa mi maqa maaqána quqásee fuaqa. 3 Ínneeqara Fáraoona qímami márifaqa qinée kaukaata qímasee qáoo qíra írirana ámiananoo sía ínniqára ufa íriannoo. Qinée moómoo náaquqara áinaina Isipa máqa máaqai áuqáananoo sía ínni ufa íriannoo. 4 Qinée firaa aupurarana uqanná Isipa máqannaasa nimisée qeeqá faiqí ánaasee aiqáma faiqí óosaa indaarúnni kiqa nífiqee fuanáura. 5 Qinee Isipa máqannaasa naruséeqa Isaraee máqannaasa misá maqa máaqaki máriana nífiqée fúànaqa Isipa máqannaasa qinée kaí Yáaweesa márunnanara misa írifaranoo.

6 Mooseesa Áaroonasa Yáaweena ufa iriséeqa dóo miqímmiqau. 7 Mooseefa Fáraoona fáqa ufa quú kári Mooseefa 80 aukuana faqáafa márufanoo Áaroonafa 83 áukuana faqáafa marínau.

Áaroona sáunù.

8 Yáaweefa Mooseesa Áaroonasa qímanniminoo qinau. 9 Fáraoofa ínni qárara moó náaquqara áinaina áuqamásaifaqa kúqaa ánoonèe qianée qínaqa Moosee anée Áaroona qímaminanoo mifá narí ásaukukinaa sáunù maqásaa Fáraoona áfusaa áqusainanoo sakánikiani.

10 Mooseesa Áaroonasa Fáraoo funnái óonuree Yáaweefa qímannímundee qiqau. Áaroonafa narí sáunù Fáraoona faqa miná úriqarara fásiqauqa faqa nífusaa áqusoofanoo sakáni kinau. 11 Fáraoofa miná qáfamaseenoo narí írirana faqáa fásiqauqa faqa narí afuneé fásiqauqa faqa náaroofaqa aniréeqa nárì afuneennóo Áaroonafa áuqòo ainaina áuqaqau. 12 Mi afunee fasiqáusa faqa náriqa sáunù maqásaa áqusoofanóo sakánikinau. Sakáni kámafufanóo Áaroona sáunù fannoo misáindi nambíqamásanau. 13 Fáraoofa miná qáfamáseenoo Yáaweefa qundée ínoo kaukaata qíra írirafa káqi minakí márufanoo sía Mooseesa Áaroonasa ufa írinau.

Mandáinaina Isipa máqannaasaki kambíqanau.

14 Sía írufanoo Yáaweefa kafáa Mooseena qímaminoo qinau. Fáraoofa káaqa kaukaata qíra írirafa minakí márifanoo idukirara ákóoqaidanoo. 15 Dúna kanánaana Fáraoofa Niru nammári áuqarara óoqufínaqa ínneeqara miná minní óoqu paqúriaqa. Sakániki mári saunúna faqa mara máree nammári áfainni óoqu márida minára rakísiaqa. 16 Paqúri máseeqa maaqí qímasee qímamiaqa. Yáaweefa Heeburu máqannaa Ánutufa maaqandá diqiqaifaqá Isaraee máqannaasa anée idukúsáinaqa aadána máqa máaqai óonuréeqa qiníara innaaru qiaqée qifaqa aní qímamidaqa. Anee sía íri máriananoo. 17 Maqee Yáaweefa aníara maaqí qídanoo. Anee qinée áuqáanna ainaina qáfamasee anee qiníara Yáawee fée qímasee írinnaranoo. Anée qáfáinaqa qinée nammari ámuaqu maa saunúnannoo rukámu ámiananoo nammári fannoo fidíkaika míannoo. 18 Miqínanoo noodáanna minakínaafauqa aiqáma kuqu taikáinanoo nammári faqa mandá únda ínaqa Isipa máqannaasa sía amana mi nammarína neefáranoo. 19 Yáaweefa Mooseena kafáa qímaminoo qinau. Anée Áaroona maaqí qímasee qímaminanoo narí sáunù qumáree aiqáma námmariuqa faqa oorákinaa námmariuqa faqa ákámmandira nammariuqa faqa aiqáma námmari ámummaqa uqéeraani. Nammari fánnoo aiqáma fidikáika kaí máfuannoo. Aiqáma Isipa máqa máaqakinaa nammariuqaki fidíka kaí máriannoo. Difáaniki faqa afeekí faqa sakaqáinafa faqa kaí fidíka áruannoo.

20 Mooseesa Áaroonasa Yáaweefa qímá nímúndee iqau. Fáraoona faqa miná úriqarara rákísirausa faqa nífusaa Áaroonafa narí sáunù uqéeraseenoo nammári ámuaqu árufanoo aiqáma mi nammárisa fidíka kaí árinau. 21 Noodáanna aiqáma námmarikinaafa kuqu taikáfufanoo nammári káaqa mandá úndúfaqa Isipa máqannaasa sía mi nammarísa née máriqau. Aiqáma Isipa máqa máaqakinaa námmariuqaki fidíka kai árinoo márinau.

22 Fáraoona afunee fásiqauqa nárìqa afuneennóo Áaroonafa undée iqau. Miqúfanóo Fáraoofa Yáaweefa qundée ínoo kaukaata qínoo Mooseesa Áaroonasa ufa sía írinau. 23 Fáraoofa miná qáfamáseenoo narí máaqai óonureenoo sía mi ainaináusara írinau. 24 Isipa máqannaasa nammáriara randóosia Niru námmari áfaiqara núkuda indufúsaida ámiqira námmari sakasáidaqa néemariqau. Ánoona nammari mandáikinoo márunara sía néemariqau. 25 Qísauku dínni taikásee dínni ani qaara marasée 7 fáasaana nammári káqi fidíka árinoo márinau.